Xia Yee Vue (Lansing)

Nchais Yig Vwj

Peb Txiv Nchais Yig Vwj yug lub 8 hlis tim 24 xyoo 1930,hauv lub zos Moos Xaj xeev xias khuam,teb chaws los tsuas , nws muaj 91 xyoo thiab 3 hlis rau xyoos 2021 no.nws txiv hu ua Txooj kaub Vwj thiab nws niam hu ua maiv Tswb lis. Nws muaj 3 leeg kwv tij thiab 3 tus muam, nws yog tu tub hlob ntawm yawg Txooj Kaub tsev neeg, nws yog tus coj nws cov kwv thiab cov muam ua liaj ua teb,tu lawv thiab khwv rau lawv noj lawv hauv txog thaum nws muaj tub muaj ntxhais loj coob lawm nws mam tawm tsev mus ua duas nws ib yig li lub teb lub chaw.

Peb txiv thiab peb niam los sib sau ua neej xyoo 1951 hauv lub zos Naj Loob nkaws muaj 5 leeg tub, Suav Yeej, Wam Txos, Ntxoov Yias, Pob Tsuas, Koob thiab 2 tug ntxhais Maiv Xia, Maiv Kaus, nkawv muaj 22 tus xeeb ntxwv. Vim kev khwv noj khwv haus thiab lub teb chaws ua tsov rog nkawv thiaj tau chais chaw los nyob rau ntau lub zos xws li lub zos Phuv Lev, Naj Las, Naj Loob,Phuv Mim,Pham Thaub/Xas Thoos, Ham ib, Phav Keb, Pham Phais.

Thaum tseem nyob rau teb chaws los tsuas peb txiv yog ib leeg txiv nquag npaj rau lub cuab lub yig tsis pub kom cov me nyuam chaib nqis thiab ntshawv luag, yam nws ntshawv nws rau siab ntso khwv los ntawm nws ob txhais tes,komtau yam ntawd. Nws yog neeg ua liaj ua teb thiab ua tub rog rau American C.I.A. Nws tsis nyiam tshuav nuj tshuav nqi, tsis nyiam plaub ntug, nyiam ua lub neej ncaj ncee muaj kev phooj ywg, kev sib raug zoo nrog kwv tij phooj ywg thiab neeg zej zog.

Xyoo 1975 thaum lub teb chaws tsis tiaj tus lawm thiaj tau khiav tawm ua cob fab/neeg hav zoov txog rau xyoo 1979, nws thiaj tau coj nws tsev neeg tuaj rau Thaib Teb xyoo 1980 thiab tuaj rau teb chaws America xeev Michigan no xyoo 1981 txog rau niaj hnub no.

Txawm yog thaum tseem nyob teb chaws los tsuas thiab thaum twb tuaj nyob rau teb chaws America lawm los xij, peb txiv yog ib tug txiv Neeb thiab nyiam yos hav zoov tua tsiaj nrog nws cov me nyuam thiab nrog nws cov phooj ywg. Txawm tias nws tsis paub ntawv heev los nws nrog nraim cov neeg zoo thiab nws paub tsav tseb rau nws poj niam mus mus los los.
Peb txiv qhov kev ncaim zaum no yog laus laus lawm xwb, yuav muab nws ua chaw tshuas, chaw nco lub suab, lub ntsej muag, lub cev ntaj ntsug, lub rooj zaum, lub chaw nyob chaw pw thiab ntau yam ntawm nws lub neej uas ua ib leeg txiv zoo nrog peb nyob ib vuag hauv lub ntiaj teb no.

Peb txiv ua lub neejnyob zoo li nthwv cua ntsawj ib vuag dhau plaws, tab sis twb tau 91 xyoo lawm. Peb txiv muaj sij hawm luag thiab lom zem nrog peb ib ntus, tab sis hnub no yog sij hawm quaj ntsuag rau peb cov me nyuam. Muaj caij quaj thiab muaj caij luag, muaj caij chim thiab muaj caij zoo siab. Hnub no thiaj li yog caij quaj ntsuag tus siab rau peb cov me nyuam thaum tseem ua neeg nyob hauv ntiaj teb no. Tab sis ib hnub tom ntej no peb yuav rov sib ntsib dua yog muaj li hais tiag.

ACKNOWLEDGEMENT
The family wishes to thank our relatives and friends for your kind expressions of concern and heartfelt sympathy during our bereavement.
May God richly bless each of you
The Family of Xai Yee Vue